Logo BDP GR

Mia vusch per Jon Domenic Parolini

Dürant il cumbat electoral toccan chartas da lectur sco’l chaschöl süls macaruns. Da cundir il trat cun masüra e dar uschea a la spaisa la nota speciala es ün misteri da per sai.

Il cartel da fabrica cun tuot sias conseguenzas ha sdarlossà nos chantun ed es amo adüna omnipreschaint i’ls mezs da massa. Eir Jon Domenic Parolini es i’l focus da la publicità, quai in sia funcziun sco anteriur capo cumünal da Scuol. Vairamaing nüglia da nouv – fingià vaira precis avant quatter ons es quai stat tema illa «Südostschweiz». Parolini ha agi avant 9 ons in quella situaziun e

suot quellas circumstanzas sco chi til paraiva indichà e commensurà. El ha però gnü la grondezza da conceder cha hoz ed in saviond ils fats vess el reagi oter.

El ha eir gnü la grondezza da’s s-chüsar in nom da la regenza grischuna pro las persunas chi han subi grondas ingüstias dürant ils ons settanta ed ottanta causa cha las instanzas tillas han plazzadas

in chasas d’orfens e sun gnüdas privadas da lur dignità. Jon Domenic Parolini nun ha delegià quella incumbensa, al cuntrari – cun sia preschentscha ha’l dat la valur toccanta a l’act simbolic e demuossà respet invers ils pertocs. Grazcha a sia empatia ed a seis sensori uman as ha Jon Domenic Parolini interessà pellas persunas chi sun stattas i’l focus da la publicità eir davo cha l’istorgia d’eira svanida our da las gazettas.

I dà partits chi propuonan da metter sülla cedla da vuschar be a glieud da lur parti. Eir quai es ün dret – ma la fin finala vegnan occupats tuots tschinch sezs. Ed ün da quels tschinch sez dess rapreschantar na be l’Engiadina e las vals dal süd, ma las abitantas e’ls abitants da regiuns periferas.

Cun Jon Domenic Parolini pudaina occupar ün da quels sezs cun üna persuna chi sustegna ideas innovativas sco l’access d’internet cul bindè larg, üna persuna chi piglia per mans eir fiers chods, chi

ha empatia, chi conceda eir da far sbagls e chi lavura. Ed i dà bler da far in nos chantun.

Aita Zanetti, Sent

 

>> Hier erfahren Sie mehr über unseren Regierungsratskandidaten Jon Domenic Parolini